Munshi Raziuddin

Munshi Raziuddin

Mujhey bai-had Khushy hai keh Farid bhai ney mujhey Baba (Munshi Raziuddin Saheb) ki barsi key moaqe par unkey barey mein chand alfaaz kehney ka kaam supurd kiya.
Mein, unhein "Baba" sirf iss liye keh raha hoon, kyon keh kuchh salon sey mein apney aap ko iss khaandaan key bohat qareeb mehsoos karta hoon, aur mere liye bhi woh ek pyarey buzurg Baba ki haisiyet rakhtey hein.

Raziuddin saheb ka taaluq Delhi ke bohat mashhoor gharaney sey tha, jiss ka naam "Qawwal Bachon ka Gharana" hai. Aaj sey taqreeban 700 saal qabal is gharaney ki iptida Hazrat Amir Khusrau ke shagirdh Saamat bin Ibrahim ne ki thi. Issi gharaney key ik bohat barrey Ustad , Tanras Khan bhi guzrey hein jo key Bahadur Shah Zafar ke darbaar ke mosiqaar they..

Munshi Raziuddin saheb sab sey pehle ek saada insaan they. Sab sey muhabbat karney waale, aur hum sub mein Illahi aur Rasool Allah SAW ki muhabbat barrhaney wale. Shayad issi kaam ka unn ko sab sey ziyada savab milley ga.

Jism ke chhotey laikin andar sey ek bohat bardey shakhsiyaat kay malik thay. Ek khazana tha un key paas, jo woh yahan chhord gaye hum sab key beech.

Woh sirf ek qawwal nahin they, balkeh ek aalim they jin ki intihai ruhani tabeeyat thi. Tasawwuf ke kalam ke maahir aur mosiqi ki tareekh ka ilm rakhney waaley. Raziuddin saheb na sirf Qawwali ke Ustad they balkeh Khayal gayeki keh bhi. Issi liye in ki qawwali ka andaaz bilkul farq tha, aur issi andaaz mein ek asal sama ka mahol banta hai. Woh jab gatey they to apni duniya mein gum ho jaatey they. Kalam ke saath AIK ho jate they. Dil mein dard aur pyar mehsoos kar key, apni mitthhas bhari awaz sey gaatey they.

Sunney mein ata hai keh woh ek sakht ustaad they. Jab bhi Farid Mian sey koi ghalti hui to ik zor ka peechhey se kachoka milta tha. Talib ko aasaan rasta nahin leiney deyete they. Iss kaam mein bhi unhein apney taalib ka faeeda nazar ata tha. Goya iss sakhti mein bhi door andaishi thi. Yeh baat ka shayad ab Farid bhai aur saathion ko ab ehsaas hota ho.

Apney qawwal bachon key ilawa, woh Pakistan ko ik aur bardi shakhseeyat chhord gaye hein, aur woh hein Naseeruddin Saami saheb. Aaj Pakistan ka sab sey maana hua classical Khayal Gaeyek jiss key galey sey ras tapakta hai.

Waisey to ustadon key ustad they, laikin (Baba) Raziuddin saheb kabhi bhi nahin chahtey they keh koi un ko "USTAD" kahey. Humaisha purani qadron key mutabiq nihayat inkaysaari say paish aathay. Hamaisha kethay thay...." keh mein to khud abhi tak seekh raa hoon, mujhey kabhi Ustad na kaho." Aisey log ab humarey beech bohat kam reh gaye hein.

Mein jab bhi Farid Ayaz aur Abu Muhammad sey koi khoobsoorat kalam sunta hoon to besaakhta dua nikalti hai Baba key liye, kyon keh yeh un ka sarmaya hai jo woh hum sub key liye chhord gaye hein. Unhon ney na sirf apna ilm-e-mosiqi Farid Ayaz ko diya, balkey hum sab tak uss ko ponhchaya hai inn key zareeye.

Allah un ko Janat main alla muqaam ata fermaey aur un ke Darjaat ko Buland karey. Ameen